شعر طلال الرشيد

كتابة - آخر تحديث: ٠٩:٣٢ ، ٢٠ أكتوبر ٢٠١٤
شعر طلال الرشيد

طلال بن عبدالعزيز بن سعود بن عبدالعزيز الرشيد، شاعر سعودي ولد سنة 1962 بمدينة الموصل في العراق ، ولقبه (الملتاع )، له العديد من القصائد سأضع بعضها هنا.


قالت قدر



قالت قدر و أقول يومك تبيني

غصبن على الدنيا يدك في يديني

لا تظلمين الوقت وش ذنب الأيام

لا تظلمين الحظ لا تظلميني

غديت مابين ارجا فيك واليأس

هذا يبي مني وهذا يبيني

إن قلت شمت وخاطري طاب كذاب

وان قالت أبيك ارخصت نفسي بعيني

خيرني أمري بين أصعب خيارين

موتي أنا أو موت الحساس فيني

لكن زماني المر علمني أني

أموت محني لجل قلبي جبيني

والله ما تلقين حبي مع الناس

روحي وها لأيام بينك وبيني


العواذل



حبيبتي كل العواذل تشابه

قلبٍ ظلام ووجه يشبه للأصحاب

ولا ما غدى لك صاحبٍ ينحكى به

لا تسمعي أن كان لك قلب وأحباب

إلى مشيت الدرب يلهث سرابه

وإلى سكنت الدار ناداني الباب

وشلون أنام وهم قلبي صوابه

والشوك ينبت بين جفنين وأهداب

تعبت امني .. الأسئلة بالاجابة

وانطر شروق الشمس والشمس بغياب

وتعبت أناظر والمعنى عذابه

أنك بعيده والملا دونك حجاب

اجمع كلام وما أعرف الإجابه

وعندي شعور صدق والوقت كذاب

كل النجوم اللي امطرت من سحابه

حبيبتي دمعك جرح قلب واتراب

واللي وقف ما بين بابي وبابه

قلبٍ ظلام .. ولابس ثوب الأصحاب


باقي الخلق في كف



انتي بكف وباقي الخلق في كف

متعليه في وسط قلبي ولك شان


في غير وصلك مالقلبي ترى شف

محتاج لك يانور عيني وشفقان


لا جابوا اسمك صرت انا تقل مختف

مالي على نفسي الى اطروك سلطان


من غير حبك غضت عيوني الطرف

ياللي جمالك صار للزين عنوان


اريد انا قربك ترى ياغذا الحرف

وان ماحصل موتي ودنياي سيان


جتني


جتني وشافتها عيون حايرات

ذا شعاع الشمس او هذا سناها


ضاعوا اللي جوا معاها مسيرات

واقبلت تمشي تقل محدٍ معاها


ياسنا الفضه وياجيد المهات

ياشذى نبت الخزامى في وطاها


قلت كن بوجنتك زهر النبات

قالت ان الرمش يجرح لي صفاها


تجرح الظلما عيون ناعسات

سلهمت وأغضت تغطرس في بهاها


حققوا بالشوف في لون الشفاة

هو خذا منها الشفق والا عطاها


ولو ظلام الليل يعطينا ثبات

فيه من لون الشعر والا كساها


كيف أباصف زين كاملة الصفات

كيف أباصل في حروفي منتهاها



ذكرى الفراق


اليوم ذكرى الفراق ومرت اول سنه

اليوم لي عام متغرب وحيد وحزين


اليوم انا ضيف جرحي جيت باطمنه

اني جمعت الدموع وجبت امانة امين


ما يجرح الصادق الا غدر من يامنه

لا جت من احباب قلبك لا تلوم السنين


مليت من هالاماني دام مهي ممكنه

لاهي تحقق ولا ياسي بوجهي يبين


لوين انا وانت مثل الشمس والازمنه

مع كل صبحٍ يجددني لشمسك حنين


لا قلت احبك احبك كنها دندنه

او كنها وردةٍ مابين اصابع جنين


يا اجمل الناس لك بين الملا هيمنه

كثير غيرك ولكن مين مثلك و وين


يا عاذلي خذ عيوني يمكن تثمنه

تشوف عيبه وانا اشوفه ملاك حسين


امس افترقنا وانا احسب مرت اول سنه

يا طولها ليلة الفرقا سنة للحزين

729 مشاهدة